Friday, January 21, 2005

மாமியாரைத் தோழியாக்க உத்திகள் தேவை!

மாமியாருடன் ஒரு நல்ல நட்பான உறவு முறையை உருவாக்கிக் கொள்வது எந்த ஒரு பெண்ணுக்குமே ஒரு பெரிய சவால் தான். பல பெண்கள் இந்த சவாலை சமாளிக்க பல உத்திகளைக் கையாண்டிருப்பார்கள். நான் கையாண்டு பயன் கிடைத்த ஒரு உத்தியை இங்கே பகிர்ந்து கொள்கிறேன். எனக்குத் திருமணம் ஆன புதிதில் மாமியார் வீட்டில் சில நாட்கள் தங்கியிருந்தேன். அப்போது எங்களுக்கிடையில் உரையாடல்கள் இடர்பாடாகத் தான் இருந்தது. எங்களுடைய எண்ண அலைகள் முற்றிலும் வெவ்வேறு அளவில் இருந்தன. என்ன பேசி மாமியாரை என் பக்கம் திருப்பலாம் என்று யோசித்துக் கொண்டிருந்தேன். ஒரு முறை என் கணவரின் குழந்தைப் பருவ புகைப்படம் ஒன்றைப் பார்த்த நான், என் மாமியாரிடம் "அவர் சின்ன வயசில் எப்படி இருப்பார், என்னென்ன குறும்புகளெல்லாம் செய்வார்?" என்று கேட்டேன். உடனே என் மாமியாரின் முகத்தில் பளிச்சென்று ஒரு பிரகாசம். என் அருகில் வந்து உட்கார்ந்துக் கொண்டார். "அதையேன் கேட்கிற? அவன் இருக்கானே..." என்று ஆரம்பித்தவர் ஆர்வத்துடன் என் கணவருடைய பல சுவாரஸ்யமான சிறு வயது நினைவுகளைப் பகிர்ந்து கொண்டார். எனாக்கு வியப்பாகவும் மகிழ்ச்சியாகவும் இருந்ததது. ஒரு வாரமாக என்னிடம் பாராமுகமாக இருந்த மாமியார், ஒரே நாளில் சற்று நெருங்கி வந்துவிட்டார். ஒரு தாய் நினைத்து நினத்து பெருமையும் மகிழ்ச்சியும் அடையக் கூடிய ஒரு விஷயம் அவள் தன் குழந்தையை சீராட்டி, தாலாட்டி வளர்த்து ஆளாக்கிய அனுபவம் இல்லையா? இதை புரிந்து கொண்ட நான், அவ்வப்போது இதைப் பற்றி என் மாமியாரிடம் பேசினேன். இது எங்களிடையே உள்ள இடைவெளியைக் குறைக்க வெகுவாக உதவியது.

ஆனால் எத்தனை நாள் அதையே பேசிக்கொண்டிருக்க முடியும்? வெவ்வேறு உத்திகளை அவ்வப்போது கண்டுபிடிக்க வேண்டியிருக்கிறது. அமெரிக்காவிலிருந்து இரண்டான்டுகளுக்கு ஒரு முறை விடுமுறைக்குச் சென்று சில நாட்கள் மாமியாருடன் தங்கியிக்கும் போதே இப்படி யோசித்து, திட்டமிட்டு நடந்துகொள்ள வேண்டியிருக்கிறதே? மாமியாருடனேயே நிரந்தரமாக தங்கியிருக்கும் பெண்களை உண்மையிலேயே பாராட்டத்தான் வேண்டும். வேறு ஏதாவது உத்திகள் யாருக்காவது தெரிந்தால் எழுதவும், அடுத்த விடுமுறைக்குச் செல்லும் போது உபயோகமாக இருக்கும்

5 comments:

Mookku Sundar said...

நல்ல உத்திதான்...

எப்போது உங்கள் கணவரைப் பற்றி உங்கள் மாமியாரிடம் பேசினாலும், அவர்களைவிட உங்கள் கணவரைப் பற்றி உங்களுக்கு கொஞ்சம் தான் தெரியும் என்கிற தொனி தெரியும்படியாக பார்த்துக் கொள்ளுங்கள். தன் அம்மாவைப் பற்றி உங்கள் கணவர் நினைவுகூர்வதை ( உதாரணம் : சமையல்) நிறைய சொல்லுங்கள்.

மற்றதை துணைத்தலைவர் பார்த்துக் கொள்வார். :-)

KARTHIKRAMAS said...

http://karthikramas.blogspot.com/2005/01/5.html :) :)

Jsri said...

மாமியோரோட சண்டை போடாம அப்படி ஒரு மாமியார் தேவைதானா? :P அந்தக் குறையை மாமியார் இல்லாத மகராசிகள்கிட்ட கேட்டா தெரியும். எவ்வளவு பேரோட சண்டை போட்டாலும் மாமியாரோட போடற சண்டைக்கு ஈடாகுமா? வயசு ஆக ஆக என்னைப் பெரிய மனுஷியா நினைச்சு, ரொம்ப மரியாதையா treat பண்றாங்களோன்னு நானே நொந்துண்டிருக்கேன். மீதி ரெண்டு மருமகளும் ஒரேவீட்டுல சேர்ந்து இருக்க நான் மட்டும் அப்பப்ப வந்துபோறதால வேற பிரச்சனை.

#) அவங்க பையனும் தானும் எவ்வளவு அன்னியோன்யம்னு (அப்படி இல்லைன்னாலும்) அப்பப்ப சொல்லிவைங்க.

#) (சுந்தருக்கு)அம்மா சமையல் பத்தி கணவன் பேசும்போதெல்லாம் திரும்ப நாம அதுக்கு அப்பளக்குழவியால தட்டினதையும் கையோட சொல்ல மறக்காதீங்க.

#) ஏன் பெருத்துட்டன்னு கேட்டா, 'உங்க பிள்ளை சமையல் சாப்ட்டு சாப்ட்டு'ன்னு சொல்லுங்க. ஏன் இளைச்சுட்டன்னு கேட்டா, 'உங்க பிள்ளைக்கு சமைச்சுப் போட்டே இளைச்சுட்டேன், என் கை பக்குவம் தவிர இப்பல்லாம் அவருக்கு வேற சமையல் பிடிக்கறதில்லைன்னு' சொல்லுங்க. ரெண்டும் இல்லாம நாம 'keep fit' மோட்ல இருந்தா கேள்வி கேக்காமலே கடுப்பாயிடுவாங்க.

ஊருக்குக் கிளம்பறேன் ஒரு மாசத்துல. இன்னும் யாராவது மாமியாரோட விடாப்பிடியா சண்டை வலிக்க வழி இருந்தா சொல்லுங்கப்பா.

தொடர்ந்து சண்டையிடுவோம்; வாழ்க்கையின் சுவாரசியங்களை இழக்காதிருப்போம்.

பிற்காலத்தில் மாமியாராக வாய்ப்பில்லாத
evergreen மருமகள்
ஜெயஸ்ரீ.

உலகத்துல தோழிகளுக்கா பஞ்சம்? அதுக்காக புனிதமான மாமியார் உறவை நாசம் செய்யாதீங்க தாரா. :)

Moorthi said...

வீட்டின் வரவு செலவை(பீரோ சாவி அக்காலம்..இக்காலத்தில் மாஸ்டர் கார்டுங்க) மாமியாரே ஏற்றிருந்தால் நிச்சயம் அவர் ஒரு நல்ல தோழிதான் உங்களுக்கு!!!

Thara said...

Jsri: உங்க மாமியார் கிட்ட சண்டை பிடித்துதான் ஆவேன் என்கிற முடிவில் இருக்கிறீர்கள் போலிருக்கு. மருமகளைத் தோழியாக்கும் உத்திகள் உங்க மாமியாருக்கு உபயோகமாக இருக்குமென்று நினைக்கிறேன். :)

மூர்த்தி: மாஸ்டர் கார்டைக் கொடுத்து மாமியாரைத் தோழியாக்கி, நான் கடனாளியாகிவிட்டால்???

தாரா.